"कुमालेसंग"
ए कुमाले दाई,
हजुर माटो समातेर
माटो नै सिगार्न सक्नुहुन्छ।
माटोलाई चक्रमा घुमाएर
माटोको मूल्य चुल्याउन सक्नुहुन्छ।
माटोलाई कोपेर
माटोको बुट्टा बनाउन सक्नुहुन्छ ।
----------------१ ----------------------------
मलाई पनि,
छातिमा माटो घसेर
माटोको बस्त्र सिलाउन मन लागेको छ।
ओछ्यानमा माटो बिछ्याएर
माटोकै सिरक ओढ्न मन लागेको छ।
माटोमा नै मानो रोपेर
माटोकै मुरी फलाउन मन लागेको छ।
---------------२ --------------------------
म माटोलाई हेर्छु,
खेतबारी टारीबारी अनेक रुप देख्छु।
म माटोलाई छुन्छु,
धान, गहु, मकै अनेक बाली खान्छु।
म माटोलाई पुज्छु,
ब्रम्हा, बिष्णु, महेश्वर सबै इश्वरलाई पुज्छु।
------------------३ ------------------------------
त्यसैले ए कुमाले दाई,
म तराइको एक मुट्ठी माटो दिन्छु
मलाई बालीनाली रुपी एउटा घैला देऊ।
म पहाडको एक चिम्टी माटो दिन्छु
कोदो मकै रुपी एउटा पाला देऊ।
म हिमालको एक ढिक्का माटो दिन्छु
स्याऊ, अंगुर रुपी एउटा हाडी देऊ।
---------४ -------------------------------
आखिर,
मेरो देशको माटो दुख्दा
मेरो मुटु पनि संगै दुख्छ।
मेरो देशको माटो बग्दा
मेरो हृदयमा पनि पैह्रो जान्छ।
मेरो देशको माटो गल्दा
मेरो आत्माको अन्तरश्वास पनि सगै गल्छ।
-------------५ -------------------------------
(समाप्त )
No comments:
Post a Comment