नेपाल मेरो घर
पूर्वी स्तम्भ किरात उत्तर दिशा सेर्पाहरूका गण
थारू दक्षिणमा र पश्चिम दिशा छेत्री तथा ब्राह्मण
माटामा इतिहास हुन्छ रजका हुन्छन् जहाँ अक्षर
सेना तीन करोड छन् सडकमा नेपाल मेरो घर
१
जो हार्दैन र हार शब्द जसले बुझ्दैन राम्रोसँग
जो मार्दैन र मार शब्द जसले बुझ्दैन राम्रोसँग
जो हेप्दैन र हेपिँदैन रणमा रोएन जो बर्बर
नेपालीपन हो घमण्ड छ ममा नेपाल मेरो घर
२
चौँरी चर्दछ खर्कमा चउरमा नाच्छन् जुरेली चरी
आँखामा करुणा असीम ममता पाइन्छ छातीभरि
सेलो बालुन धाननाच सुरिला भाका असारे हर
भाषा वाङ्मयको धनी मुलुक यो नेपाल मेरो घर
३
ज्ञानी बुद्ध बनेर जीवन खुसी सद्भाव घोकाउँछ
वैदेही भृकुटी बनेर जगमा संस्कार सम्झाउँछ
जन्माई बलबाहु विश्वभरि नै बाँड्यो कला सुन्दर
छाती फुल्दछ गर्वले किनकि हो नेपाल मेरो घर
४
आँखा चन्द्र र सूर्य छन् र शिरमा सर्वोच्च कैलास छ
आमाको प्रिय काखमा छु न कुनै पीडा न सन्त्रास छ
आफैँमा छ महत्वको मुलुकको माटो धुलो पत्थर
केही गर्व छ भूमिपुत्र परियो नेपाल मेरो घर ।
५
--कबि सोम निरौला
No comments:
Post a Comment