धरहरासंग एकछिन :
धरहरा,
प्रत्येक बिहान झिसमिसेमा
चेतनाको कालो भालेसंगै
जागरुकताको लागि बास्ने गर्छ।
--------१ -----------------------
धरहरा,
प्रत्येक मध्यान्हको चर्को घाममा
अनुभवको खलखली पसिना निकाल्दै
पैदल यात्रीलाई निरन्तर नियाल्ने गर्छ।
-----२ ----------------------------------
धरहरा,
प्रत्येक साझपखको व्यस्त भीडभाडमा
सुरक्षाको पहरेदार बनेर
अविछिन्न निरन्तर खटिईरहन्छ।
--------------३ -----------------------------
धरहरा,
प्रत्येक रातको जूनेली रातमा
जूनको प्रकाशले चकमन्नित पारेर
रानीपोखरीमा सत्यताको बिम्ब हेरिरहन्छ।
------------------४ ----------------------------
भो,
धरहरालाई घन्टाघरको घंटीले ब्युताउनुपर्दैन
धरहरालाई रानीपोखरीको मन्दिरले पनि सम्झाउनुपर्दैन
धरहरालाई रत्नपार्कको फूलले पनि लोभ्याउनुपर्दैन।
---------------------५ ----------------------------------
धरहरा अडिग छ,
धरहरा अटल छ
बरु म पनि -
धरहराजस्तै निर्भिक हुन सकूँ
धरहराजस्तै निडर बन्न सकूँ
"म झुक्दै नझुक्ने नेपालको छोरो "
-------------------६ -------------------------
(समाप्त )
